Nos Estados Unidos, o Immigration and Customs Enforcement (ICE) actúa como un dispositivo estatal que exerce unha coerción sistemática sobre a poboación migrante. No contexto actual, marcado por un incremento da violencia e da persecución institucional —con episodios que tiveron consecuencias letais para persoas migrantes—, estas prácticas adquiren unha gravidade aínda maior. A morte deixa de ser unha anomalía para converterse nun efecto asumido dunha política que prioriza a disuasión mediante o medo. As detencións arbitrarias, as redadas e as operacións sen autorización xudicial sitúanse nas marxes das garantías constitucionais, cando non as vulneran abertamente.
Este aumento da persecución responde a unha lóxica de control social que identifica a migración como un “inimigo interno”, facilitando a súa estigmatización e deshumanización. O dano recae sobre comunidades precarizadas, mentres o beneficio político concéntrase en quen promove axendas securitarias e excluíntes.
O uso do medo como ferramenta política é un trazo estudado nos réximes fascistas. Unha característica común é que a violencia institucional se exerce de forma preventiva e exemplarizante, co obxectivo de impor unha visión de “nova nación”. Estruturas como a SA na Alemaña nazi actuaban non só de maneira operativa, senón tamén como instrumentos de terror social, estendendo o medo máis alá das persoas directamente agredidas e normalizando a violencia política. No contexto contemporáneo dos Estados Unidos, a política migratoria de Trump reflicte unha lóxica semellante: ao estigmatizar e perseguir sistematicamente a poboación migrante, busca consolidar unha idea excluínte de nación que redefine quen pertence e quen queda á marxe.
Neste marco, o ICE funciona como unha engrenaxe dun modelo de Estado policial contemporáneo que prioriza a forza fronte ao dereito, reforzando un clima de inseguridade permanente. Organizacións de dereitos humanos teñen alertado sobre estas dinámicas e a súa incompatibilidade cos estándares democráticos. Informes e documentación xurídica permiten analizar o fenómeno con rigor, como os da American Civil Liberties Union (ACLU):
https://www.aclu.org/issues/immigrants-rights/ice-and-border-patrol-abuses
