Unha filtración de 37 audios revela unha presunta operación conxunta de Estados Unidos e Israel para influír en políticos latinoamericanos, desestabilizar gobernos progresistas e favorecer o retorno ao poder do expresidente hondureño Juan Orlando Hernández , condenado por narcotráfico e posteriormente indultado por Donald Trump. As gravacións, difundidas polo medio Diario Red e o sitio Hondurasgate.ch, abranguen conversacións mantidas entre xaneiro e abril de 2026 a través de aplicacións como WhatsApp, Signal e Telegram.
No centro das acusacións aparece Juan Orlando Hernández, que gobernou Honduras entre 2014 e 2022. En 2024 foi sentenciado en Nova York a 45 anos de prisión por conspirar para importar centos de toneladas de cocaína aos Estados Unidos, nun caso no que os fiscais cualificaron o país como un “narcoestado”. Con todo, Trump indultouno a fins de 2025, en vésperas das eleccións hondureñas que gañaría Nasry Asfura. Nun dos audios, unha voz que a investigación atribúe a Hernández afirma: “O diñeiro do indulto nin sequera saíu de vostedes. Saíu dunha xunta de rabinos” e engade que o primeiro ministro israelí Benjamín Netanyahu tivo “todo que ver” coa súa liberación e coa negociación.
Os audios tamén describen un plan para converter Honduras nun enclave estratéxico ao servizo de intereses estranxeiros. Entre as medidas negociadas están a expansión das Zonas de Emprego e Desenvolvemento Económico (ZEDES), que permiten xurisdicións privadas alleas ao Estado; a construción dunha nova base militar estadounidense; un tratado de libre comercio; e lexislación favorable a empresas de intelixencia artificial. Hernández desenvolvería ademais a creación dunha “célula informativa” con sede en Estados Unidos, financiada en parte polo presidente arxentino Javier Milei con 350.000 dólares, para “extirpar o cancro da esquerda” en Latinoamérica, con México e Colombia como primeiros obxectivos.
Tras as revelacións, a presidenta mexicana Claudia Sheinbaum atribuíu a trama a un esforzo da “dereita internacional” para difundir falsedades. O presidente colombiano Gustavo Petro cuestionou nunha rede social: “Que razón ten o señor Netanyahu para pagar por liberar un gran narcotraficante, expresidente de Honduras, só co fin de destruír o goberno de Colombia e México?” . Mentres Hernández negou que a voz que aparece nos audios é a súa e denunciou unha campaña de desinformación, ao tempo que o sitio web Hondurasgate.ch recibiu no seu primeiro día máis de 40.000 ataques de hacking procedentes de Estados Unidos e Israel.
Fontes
-
Diario Red e Hondurasgate.ch (2026). Investigación publicada en exclusiva, recollida por Euronews.
-
Euronews (2026). ‘Hondurasgate’: La injerencia de EE.UU. y Trump para devolver al poder al expresidente de Honduras. https://es.euronews.com/2026/04/30/hondurasgate-eeuu-y-trump-conspiraron-para-devolver-al-poder-al-expresidente-de-honduras
-
France-Presse (AFP) vía France24 (2026). “Hondurasgate”, unos audios revelan una supuesta trama de EEUU contra la izquierda en Latinoamérica. https://www.france24.com/es/minuto-a-minuto/20260511-hondurasgate-unos-audios-revelan-una-supuesta-trama-de-eeuu-contra-la-izquierda-en-latinoamérica
-
Diario y Radio Universidad de Chile (2026). Hondurasgate: la trama internacional contra gobiernos de izquierda en América Latina. https://radio.uchile.cl/2026/05/09/hondurasgate-la-trama-internacional-contra-gobiernos-de-izquierda-en-america-latina/
-
Cubainformación (2026). Hondurasgate: EEUU e Israel convierten a Honduras en su base contra Latinoamérica. https://www.cubainformacion.tv/america-latina/20260507/122508/122508-hondurasgate-eeuu-e-israel-convierten-a-honduras-en-su-base-contra-latinoamerica
