A Axencia Estatal de Meteoroloxía (AEMET) alerta hoxe da entrada dunha nova onda de calor, cando Europa aínda non se recuperou da anterior. Tras un mes de maio de récord de calor veu un mes de xuño aínda peor, con temperaturas no sur de Europa entre 5 e 12ºC máis altas do normal para a época, e este xullo parece que as temperaturas seguirán sendo infernais.
O 23 de xuño, Météo-France sinalou que ese día foi o máis caloroso desde que comezaron as medicións en 1947. En Francia, con temperaturas de máis de 45ºC, tiveron que deter varios reactores nucleares pola calor extrema, algo que non se previra. Ademais de provocar a morte de miles de persoas, as ondas de calor aumentan moito o risco de incendios, aínda máis coas condicións de seca de gran parte do sur de Europa.
Segundo Rubén del Campo (AEMET), “En 2025, España estivo baixo unha onda de calor un de cada tres días”. O quecemento global provocado pola emisión de combustibles fósiles empeorou as ondas de calor en Europa en tan só unhas décadas, e algunhas zonas do continente sofren ata 40 días máis de estrés térmico extremo que na década de 1970. Ademais, o evento de quecemento tropical periódico de “El Niño” botou máis leña ao lume este ano.
A temperatura global do planeta aumentou máis de 0.4ºC no anterior período de “El Niño”, en 2023 e 2024, sorprendendo as científicas e os científicos do clima. Parte deste quecemento tan brutal pode deberse a restricións nas emisións de aerosois por barcos comerciais. Os aerosois son partículas de po en suspensión, que son emitidas xunto aos gases de efecto invernadoiro e que absorben parte da luz solar, reducindo o efecto invernadoiro. Hai grande incerteza no seu efecto no quecemento global posto que o seu estudo é complexo.
Xa superamos o límite de seguranza de 1.5ºC de quecemento, que era o obxectivo a non exceder do fracasado Acordo de París. A Terra é agora máis quente que en calquera momento do Holoceno, os últimos 11.700 anos. O planeta está a deixar de ser habitábel en moitas rexións. As estratexias de adaptación e mitigación son máis urxentes ca nunca: fin dos combustibles fósiles, agricultura rexenerativa, acollida de persoas refuxiadas polo cambio climático… e un profundo cambio do sistema.
O fin do capitalismo é inevitábel. Só falta decidir entre derrubalo para tentar paliar os peores efectos dunha crise climática imparábel ou esperar a que colapse xunto coa civilización humana.
Fontes
- Agencia Estatal de Meteorología (AEMET). (2026, 4 de julio). Aviso especial. Ola de calor (Aviso especial de fenómenos adversos número 20/2026). https://www.aemet.es/es/eltiempo/prediccion/destacados/p5_t?tipo=p52tesp1
- Desnivel. (s. f.). Una cascada en la cara norte del Cervino vuelve a evidenciar el cambio climático en los Alpes. https://www.desnivel.com/alpinismo/una-cascada-en-la-cara-norte-del-cervino-vuelve-a-evidenciar-el-cambio-climatico-en-los-alpes/
- El Confidencial. (2026, 26 de junio). Francia se ve obligada a cerrar dos reactores nucleares por culpa del calor y ese es un problema con el que Europa no contaba. El Confidencial. https://www.elconfidencial.com/tecnologia/2026-06-26/francia-cierra-centrales-nucleares-calor-1qrt_4379255/
- IPCC. (2023). AR6 Synthesis Report: Climate Change 2023.
- laSexta. (2026, 4 de julio). Una ola de calor tras otra: la nueva normalidad del verano en España con temperaturas cada vez más extremas. laSexta.com. https://www.ipcc.ch/report/sixth-assessment-report-cycle/
- Hansen, J.E. et al. (2025). Global Warming Has Accelerated: Are the United Nations and the Public Well Informed? Environment: Science and Policy for Sustainable Development, Vol 67, 2025 – Issue 1 https://www.tandfonline.com/doi/full/10.1080/00139157.2025.2434494#abstract
- World Weather Attribution. (2026). Fossil fuel emissions have rapidly worsened European heatwaves in just a few decades. https://www.worldweatherattribution.org/fossil-fuel-emissions-have-rapidly-worsened-european-heatwaves-in-just-a-few-decades/
